دراسة حالة: لما السعر ما يوضحش قيمة الخدمة

ازاي رفعنا أسعار الخدمات بين 15% و30% عشان نزود المبيعات؟ تجربة مركز عناية بالبشرة كان بيستخدم خامات أفضل، لكن المبيعات كانت ضعيفة.

Read this article in English

دراسة حالة

دراسة حالة: التسعير وقيمة الخدمة

صاحب مركز عناية بالبشرة كان عنده مشكلة: المبيعات ضعيفة، رغم إنه بيستخدم مواد طبيعية 100% وخامات أفضل من المنافسين. بعض خدمات المركز كانت بنفس أسعارهم، وخدمات تانية أغلى بحوالي 5% بس.

لما درست النشاط والمنافسين، ظهر إن العميل كان بيقارن المركز ببدائل أقدم ومعروفة ليه. ومع تقارب الأسعار، وغياب شرح واضح لفرق الخامات، كان بيفضّل يروح للمكان اللي يعرفه.

من هنا، اشتغلنا على التسعير والمحتوى مع بعض. رفعنا أسعار الخدمات بنسب بين 15% و30%، وبدأنا نشرح على السوشيال ميديا الفرق بين الخامات والخدمات، وايه المناسب لأنواع البشرة المختلفة. وبعد التغيير، لاحظنا زيادة في الحجوزات.

محتويات المقال

خامات أفضل، لكن المبيعات ضعيفة

التجربة كانت مع مركز عناية بالبشرة في بداية نشاطه. كان بيقدّم خدمات زي تنظيف البشرة، والتقشير البارد والماسي، والديرما بن، وبيعتمد على مواد طبيعية 100% تكلفتها أعلى من الخامات اللي بيستخدمها بعض المنافسين.

صاحب النشاط كان شايف إن جودة الخامات نقطة مهمة تميّز المركز. لكن المبيعات كانت ضعيفة، رغم إن الأسعار قريبة جدا من المنافسين.

المشكلة اللي احتجنا نفهمها كانت: ليه الفرق اللي صاحب المركز شايفه في الخدمة مش بيظهر بنفس الوضوح في اختيار العميل؟

العميل كان بيقارن بمكان يعرفه

المنافسين كانوا موجودين في السوق من فترة، والعميل عارفهم. فكان قدامه مركز جديد بيقدّم بعض الخدمات بنفس السعر، وخدمات تانية بزيادة بسيطة، لكن الفرق في الخامات وطريقة تقديم الخدمة مش واضح له.

في المقارنة دي، المركز الجديد ما كانش بيعرض اختلافه بشكل كافي. العميل كان بيشوف خدمة باسم مألوف وسعر قريب، فيرجع للمنافس اللي يعرفه، خصوصا لو سعره أقل أو مساوي.

دوري كان في دراسة النشاط ومقارنته بالمنافسين، وربط اللي ظهر من المقارنة بقرارات نقدر نشتغل عليها. والمراجعة وضّحت إننا محتاجين نعيد النظر في تسعير المركز، وفي الطريقة اللي بنشرح بيها الخامات والخدمات.

ثلاث نقاط في تحليل مركز العناية بالبشرة: الخامات والخدمة، والسعر والمنافسون، وفهم العميل للفرق.
المقارنة جمعت بين الخدمة، وتسعير البدائل، والصورة اللي بتوصل للعميل.

رفعنا الأسعار بنسب بين 15% و30%

بعد المراجعة، عدّلنا أسعار الخدمات بزيادة تراوحت بين 15% و30%. الهدف كان إن التسعير يبقى أنسب لطبيعة الخدمة والخامات المستخدمة، ويساعدنا نقدّم المركز باتجاه أوضح.

قرار التسعير كان جزء من تغيير طريقة تقديم المركز. وكان محتاج محتوى يوضّح للعميل ايه اللي مختلف في الخدمة اللي قدامه، عشان المقارنة ما تفضلش واقفة عند اسم الجلسة وسعرها.

وبدأنا نشرح فرق الخامات على السوشيال ميديا

اشتغلنا على محتوى توعوي يشرح طبيعة المواد المستخدمة، والفرق بين كل خامة والتانية، وطريقة تقديم الخدمات. ووضحنا إن أنواع البشرة مختلفة، وإن اختيار المواد المناسبة ليها جزء مهم من الخدمة.

بدل ما نتكلم عن اسم الخدمة بس، بدأنا ندي مساحة أكبر للمعلومات اللي تساعد العميل يفهم الاختلاف: المركز بيستخدم ايه؟ وايه الفرق بين الاختيارات؟ وليه نوع البشرة مهم في اختيار المواد المستخدمة؟

كده، تعديل الأسعار كان ماشي مع شرح أوضح للخدمة. والسوشيال ميديا بقت مساحة نعرض فيها نقطة التميز اللي كانت موجودة فعلا، لكن مش واضحة بما يكفي للعميل.

تعديل أسعار الخدمات بنسب بين 15% و30% مع محتوى يشرح الخامات وملاءمتها لأنواع البشرة؛ وبعد التعديل لاحظنا زيادة في الحجوزات.
راجعنا الأسعار، واشتغلنا على محتوى يشرح فرق الخدمة في نفس الوقت.

بعد التغيير، لاحظنا زيادة في الحجوزات

بعد تعديل التسعير والشغل على محتوى التوعية، لاحظنا إن الحجوزات زادت. المركز كان بيقدّم للعميل معلومات أوضح عن الخامات والخدمات، مع أسعار اتراجعت على أساس طبيعة اللي بيقدّمه.

أهم نقطة بالنسبة لي كانت إن دراسة المنافسين غيّرت اتجاه القرار. شكوى ضعف المبيعات خلّتنا نراجع التسعير وشرح الخدمة، بدل ما نكتفي بالمقارنة بين أرقام قوائم الأسعار.

تحليل المنافسين لازم يساعدك تاخد قرار

لو بتقدّم خدمة مختلفة، تقارب سعرك مع المنافس مش كفاية عشان العميل يلاحظ الفرق. محتاج تبص على الخدمة اللي بتقدّمها، والبدائل اللي العميل بيقارن بيها، والمعلومات اللي بتوصله عنك.

في التجربة دي، كانت الخامات الأفضل موجودة من البداية. الشغل كان في مراجعة تسعيرها، وإظهار الاختلاف بشكل أوضح من خلال المحتوى.

وده اللي بشرحه في مقال تحليل المنافسين: ازاي تحوّله لقرارات عملية؟: قيمة المقارنة بتظهر في القرار اللي بتساعدك تاخده. هنا، القرار شمل تعديل الأسعار وطريقة التواصل مع العميل مع بعض.

ولو بتراجع طريقة تقديم نشاطك ومحتاج تفهم الصورة اللي بتوصل لجمهورك، تقدر تبدأ بـمراجعة التسويق قبل زيادة الميزانية، أو تحكيلي عن مشروعك عشان نناقش احتياجك.

Hossam Salah
Hossam Salah
Articles: 56

اترك تعليقًا

لن يُنشر بريدك الإلكتروني. الحقول المطلوبة مميزة بعلامة *.